पसलबाट अपहरण गरि ९ महिने बालिकाको हत्या, फेरि बचाउन असफल भए प्रहरी

रौतहट / रौतहटको औरही नगरपालिका–१ स्थित एक पसलबाटै अपहरण गरिएकी ९ महिनाकी बालिकाको हत्या भएको छ । आँप बगैंचामा फेला परेको बालिकाको शव भेटिएको स्थलको निरीक्षण गर्दै प्रहरी

औरही बजारका किराना पसलका सञ्चालक सन्तोष चौधरीकी ९ महिने छोरी सोनालिकाको हत्या भएको हो । बालिकाको शव सोमबार अपरान्ह औरही नगारपालिकास्थित फेकु चौधरीको आँप बगैंचामा फेला परेको प्रहरीले जनाएको छ । घटनाको विरोधमा स्थानीय व्यापारीले विहानैदेखि औरही बजार बन्द राखेका छन् । उनको हत्या कसरी भयो खुल्न सकेको छैन । तर घटनस्थलबाट प्रहरीले दिएको प्रारम्भिक जानकारी अनुसार बालिकाको शरीरभरी नीलडाम देखिएको छ । घटनाबारे थप अनुसन्धान भइरहेको प्रहरीले जनाएको छ ।

बालिकालाई भंगाहा सीतापुर–६ जमुनियाका २५ वर्षीय भरत साहले खेलाउने बहानामा आइतबार साँझ अपहरण गरेको पारिवारिक स्रोतले जनाएको छ । साह केही समयदेखि औरहीमा देखा पर्दै आएका थिए । स्थानीयका अनुसार साहको गतिविधि संदिग्ध थियो । चौधरीको पसलमा रहेको सीसी टीभीबाट पनि साहले बालिकालाई बोकेको फुटेज फेला परेको प्रहरीले जानकारी दिएको छ ।

मृतकका बुवा सन्तोषले जनाएअनुसार राखी परेकोले उनी आइतबार मंलवास्थित बहिनीको घर गएका थिए । पसलमा पत्नी र केटाकेटी थिए । सोही मौका पारेर साह टोपी किन्ने बहानामा आफ्नो पसलमा पुगेको उनले जनाए । ‘टोपी किन्ने निहुँ पारेर ऊ मेरो पसलमा पसेछ’ सन्तोषले भने, ‘मेरो श्रीमतीसँग टोपीको कुरा पनि गरेछ । अनि मेरो नाम लिंदै सन्तोष दाइले दाम मिलाएर दिनुहुन्छ तपाई त चिन्नु पनि हुन्न भन्दै मेरो छोरीलाई काखमा बोकेछ । खेलाउँदा खेलाउँदै मेरी श्रीमती सामान बेच्न व्यस्त भएको मौका छोपी बेपत्ता बनाएछ । हत्या गर्ला भनेर त सोचेका पनि थिएनौं ।’

अपहरणको जानकारी लगत्तै जिल्ला प्रहरीका डिएसपी खगेन्द्रबहादुर खड्काको कमाण्डमा रातिदेखि नै खोजी शुरु भएको थियो । तर, प्रहरीको यो प्रयास अन्नतः विफल बनेको छ । परिवार र गाउँलेले घरदेखि भारतीय सीमासम्म खोजी कार्य जारी राखेका थिए । अपरान्ह गाउँकै बगैंचामा बालिकाको शव फेला परेपछि अहिले औरही शोकमा डुबेको छ । घटनामा संलग्न साहबारे प्रहरीले उनको बुवा र दाजुसँगै सोधपुछ गरिरहेको जनाएको छ । केहि समयअघि मात्र काठमाडौं काँडाघारीका एक बालकको अपहरणपछि हत्या भएको थियो ।