बस दुर्घटनामा तीन जनाको मृत्यु, २७ घाइते प्रकाशित मिति : ११ भाद्र २०७६, बुधबार १०:४३ काठमाडौं भदौ ११ / जाजरकोटबाट नेपालगञ्जतर्फ जाँदै गरेको बस बिहान रत्न राजमार्गअन्तर्गत पर्ने भेरीगङ्गा नरगपालिका–५ स्थित हर्रेमोडमा दुर्घटना हुँदा तीन जनाको मृत्यु भएको छ भने २७ जना घाइते भएको छ । जिल्ला प्रहरी कार्यालय सुर्खेतका अनुसार ना ४ ख ९३१७ नं को बस अन्दाजी बिहान साढे ३ः०० बजे दुर्घटना हुँदा एकको घटनास्थलमै र दुई जनाको उपचारको क्रममा कोहल्पुर मेडिकल कलेजमा मृत्यु भएको हो । मृतकमध्ये दुई महिला र एक पुरुष रहेका छन् । अहिले घाइतेहरुको भेरीगङ्गा नगरपालिकास्थित मेडिकल र कोहलपुर मेडिकल कलेजमा उपचार भइरहेको छ । सुर्खेतका प्रहरी नायब उपरीक्षक रवि रावलले मृतकको सनाखत हुन बाँकी रहेको बताए । दुर्घटनाको भने तीव्रगतिका कारण हुनसक्ने प्रहरीको अनुमान छ ।
