संविधान भन्दा माथि कोही पनि छैन :सुवासचन्द्र नेम्वाङ प्रकाशित मिति : ५ आश्विन २०७६, आईतवार १०:२२ काठमाडौं, असोज ५ / पूर्व सभामुख सुवासचन्द्र नेम्वाङले संविधानसभाबाट निर्माण भएको संविधान भन्दामाथि कोही नभएको बताएका छन् । शनिबार आयोजित ‘इलाम साहित्य महोत्सव’ को कार्यक्रममा नेम्बाङले वर्तमान सरकारमाथि औंला उठाउनु आवश्यक नभएको बताउँदै संविधान भन्दा माथि गएर सरकारले कुनै काम नगर्ने बताएका छन् । फाईल तस्विर उनले विगतका संविधानसँग दाँजेर संविधानसभाबाट निर्माण भएको संविधानलाई अवमूल्यन गर्न खोजेको भन्दै संविधान भन्दा बाहिर गएर कसैले केही गरे त्यो स्वीकार नहुने उल्लेख समेत गर्नुभयो । ‘अब नेपाली जनताले अधिकारका लागि लड्नु पर्दैन’, नेम्वाङले भने, ‘सबै अधिकार हाम्रो संविधानले दिइसकेको छ, सबैका भावना समेटिएको छ संविधानमा ।’ नेपाल कम्युनिष्ट पार्टी (नेकपा)का उपनेता समेत रहेका नेम्वाङले सरकारले जनताको भावना विपरीत कुनै काम नगर्ने भन्दै त्यसबारेमा सबैले बुझ्न आवश्यक रहेको उल्लेख गरे ।संविधानको प्रस्तावनामा नै जनताले निर्माण गरेको ‘बहुजातीय, बहुधार्मिक र बहुसांस्कृतिक मुलक’ लेखिएकाले पनि सबैको पहिचानलाई अपनत्व गरेको बुझ्नुपर्ने नेम्वाङले स्पष्ट पारे । कार्यक्रममा नेपाली काङ्ग्रेसका प्रवक्ता विश्वप्रकाश शर्माले इलामको साहित्यिक महोत्सवमा ‘के गणतन्त्र खतरामा छ ? भन्ने शीर्षकमाथि बहस गर्दै उनले राष्ट्र र राष्ट्रियताका विषयमा सत्तापक्ष र विपक्ष भन्न नमिल्ने बताए । उनले नेपालमा गणतन्त्रमाथि खतरा भएको बताउँदै वर्तमान सरकारले अनावश्यक आशङ्का गरेको आरोप लगाए । उनले वर्तमान सरकारले जनताको अपेक्षाअनुसार काम गर्न नसक्नाले गणतन्त्रको विषय प्रवेश गरेर ‘पानीमाथिको ओभानो’ हुन खोजेको शर्माले आरोप लगाए । शर्माले काङ्ग्रेस धर्मनिरपेक्षता र गणतन्त्र ल्याउन लडेको पार्टी भएकाले यसमाथि काङ्ग्रेस कटिबद्ध रहेको पनि बताएका छन् ।
