माओवादी केन्द्र सिदिङ्वा गाउँपालिकाको अध्यक्षमा अमर इधिङ्गो चयन प्रकाशित मिति : ११ मंसिर २०७८, शनिबार १८:४७ काठमाडौं। नेपाल कम्युनिस्ट पार्टी (माओवादी केन्द्र) सिदिङ्वा गाउँपालिकाको दोस्रो सम्मेलनबाट अमर इधिङ्गो लिम्बू अध्यक्षमा चयन हुनुभएको छ । शुक्रबार राति अबेर सम्पन्न सम्मेलनको बन्दसत्रले इधिङ्गोको अध्यक्षतामा ५५ सदस्यीय गाउँपालिका कार्यसमिति सर्वसम्मत चयन गरेको हो ।कार्यसमिति उपाध्यक्षहरुमा यामबहादुर बानियाँ, सुमित्रा सेलिङ र गौरीमान इधिङ्गो, सचिवमा किरण लिङ्देन, सहसचिवमा छविलाल चौहान चयन हुनुभएको छ । ताप्लेजुङका नौ स्थानीय तहमध्ये सिदिङ्वा गाउँपालिकामा माओवादी केन्द्रले निर्धारित तालिकाभन्दा एकदिन अघि नै पालिका सम्मेलन सम्पन्न गरेको हो ।सिदिङ्वा गाउँपालिकाको दोस्रो सम्मेलनको उद्घाटन नेकपा (माओवादी केन्द्र) का केन्द्रीय सदस्य एवम् प्रदेश १ का आर्थिक मामिला तथा योजना मन्त्री इन्द्रबहादुर आङ्बो (मौसम) ले गर्नुभएको थियो । गाउँपालिका केन्द्र साब्लाखुमा शुक्रबार दिउँसो भएको पालिका सम्मेलनको उद्घाटन समारोहमा पार्टीका केन्द्रीय सदस्य आङ्बोसहित प्रदेश १ कमिटीका सदस्य एवम् ताप्लेजुङ जिल्ला इन्चार्ज खेलप्रसाद बुढाक्षेत्री (पराग), प्रदेश कमिटी सदस्य तथा ताप्लेजुङ निर्वाचन क्षेत्र नं. १(क) का इन्चार्ज मिङमाडण्डु शेर्पा लगायतको उपस्थिति रहेको थियो ।यता बाँकी रहेका ताप्लेजुङका आठमध्ये मिक्वाखोला गाउँपालिकाबाहेकका स्थानीय तहमा शनिबार सम्मेलन सम्पन्न हुने माओवादी केन्द्रका जिल्ला संयोजक विजयप्रकाश वनेमले जानकारी दिनुभयो । मिक्वाखोलामा भने मङ्सिर १३ गते सम्मेलन गर्नेगरी मिति तय गरिएको पनि जिल्ला संयोजक वनेमले बताउनुभयो ।राष्ट्रिय सम्मेलनको तयारीमा रहेको माओवादी केन्द्रले देशभर वडा अधिवेशन सम्पन्न गरेको जनाएको छ । माओवादी केन्द्रले पालिकास्तरीय सम्मेलन शनिबार एकैदिन सम्पन्न गर्नेगरी यसअधि नै कार्यतालिका सार्वजनिक गरेको छ ।