आफ्नै घरेलु मैदानमा बार्सिलोनाद्धारा रियल म्याड्रिडको लज्जास्पद हार प्रकाशित मिति : ७ चैत्र २०७८, सोमबार ०७:३० एजेन्सी । बार्सिलोनाले रियल म्याड्रिडलाई उसैको घरेलु मैदानमा हराएको छ । आइतबार राति भएको खेलमा बार्सिलोनाले ४-० को शानदार जीत हासिल गरेको हो । बार्सिलोनालाई जीत दिलाउन पहिलो क्लासिको खेलिरहेका पीएरे एमरिक आउबामियाङ नायक रहे उनले दुई गोलको गर्नुका साथै एक गोलको अवसर सिर्जना गरे । आउबामियाङले खेलको २९ औँ मिनेटमा ओसमान डेम्बेलेको पासमा बार्सालाई अग्रता दिलाएका थिए । ३८ औँ मिनेटमा रोनाल्ड अराउजोले बर्साको अग्रता दोब्बर बनाए । दोस्रो हाफमा फेरान टोरेस र आउबामियाङले एक एक गोल गर्दै टोलीलाई सहज जीत दिलाए । यसअघि लगातार पाँच वटा एल क्लासिको जितेको रियल लिगमा ९ खेल बाँकी छँदा दोस्रो स्थानमा रहेको सेभियाभन्दा ९ अंकले अघि रहेको छ । बार्सिलोना सेभियाभन्दा ३ अंकले पछि रहेको छ । बार्सा पछिल्ला १२ खेलमा अपराजित रहेको छ ।
