चैत २१ गतेबाट ब्रिटिस गोर्खा र सिंगापुर पुलिसमा भर्नाका लागि आवेदन दिन सकिने प्रकाशित मिति : १६ चैत्र २०७८, बुधबार ११:०६ काठमाडौं । ब्रिटिस गोर्खा र सिंगापुर पुलिसमा भर्ना हुनका लागि आवेदन खुला हुने भएको छ । विगतका वर्षहरुमा जस्तै २०२३ का लागि ब्रिटिस गोर्खा र गोर्खा कन्टिन्जेन्ट सिंगापुर पुलिस फोर्समा यही चैत २१ गतेबाट नयाँ भर्ना खुला हुने भएको हो । इच्छुक उम्मेदवारले अनलाइनमार्फत आउँदो वैशाख २५ गतेसम्म आवेदन दिन सक्नेछन् । गोर्खा भर्तीका लागि न्यूनतम एसएलसी÷एसईई उत्तीर्ण भएको हुनुपर्नेछ । दुवै ब्रिटिस गोर्खा र सिंगापुर पुलिसमा भर्ती हुनका लागि अंग्रेजी र गणितमा सी ग्रेडिङ प्रणाली अनिवार्य हुनुपर्नेछ । सन् २०२३ जनवरी १ सम्म कम्तीमा १८ वर्ष पुगेको र बढीमा २१ वर्ष ननाघेको हुनुपर्नेछ । उचाइ कम्तीमा १५८ सेन्टिमिटर हुनुपर्नेछ ।
