अग्रिम टिकट बुकिङ खुल्ला असोज १ गतेबाट

काठमाडौं । दशैंका लागि अग्रिम टिकट बुकिङ असोज १ गतेबाट खुल्ने भएको छ । यातायात व्यवस्था विभागमा बुधबार बसेको बैठकले आगामी असोज १ गतेबाट टिकट खुल्ला गर्ने निर्णय गरेको हो ।

घरमै बसेर अग्रिम टिकट अनलाइन मार्फत बुकिङ गर्न सकिने विभागले जनाएको छ । बैठकले अग्रिम टिकट बुकिङ्ग तथा उपत्यकाबाट बाहिरिने र भित्रिने यात्रुवाहक सवारी साधनको विभिन्न निकायसँग सहकार्य गरी प्रभावकारी रुपमा अनुगमन गर्ने निर्णय गरेको छ ।

विभागले कोभिड–१९ को महामारीलाई मध्यनजर गरी मास्क लगाएर या अन्य स्वास्थ्य मापदण्ड पालना गरी गाडी चलाउन आग्रह गरेको छ । यातायत व्यवसायीहरुले यात्रुलाई खाना/खाजा खुवाउने स्थानमा भीडभाड नहुने व्यवस्था मिलाउन विभागले आग्रह गरेको छ ।

विभागले यातायात आवागमनलाई सहज बनाउन खाद्यान्नलगायत अत्यावश्यक वस्तुको ढुवानी गर्ने बाहेकका टे«लरलगायत ठूला सवारी साधन असोज १५ गतेदेखि २२ गतेसम्म नारायणघाटदेखि काठमाडौँसम्म सञ्चालनमा रोक लागएको छ ।

त्यसैगरी यात्रुवाहक सवारी साधनलाई घटस्थापनादेखि पूर्णिमासम्म नेपालभर लागू हुने गरी रुट परमिट खुला गरिएको छ ।