निकारागुवामा न्यायमाग्दै हजारौँको प्रदर्शन प्रकाशित मिति : १६ बैशाख २०७५, आईतवार १८:४१ मानागुवा / निकारागुवामा न्यायमाग्दै विश्वविद्यालयका विद्यार्थीले शनिबार शान्तिपूर्णरुपमा प्रदर्शन गरेका छन् । प्रदर्शनमा सहभागीले आन्दोलनमा सहभागी भई निधन भएकाप्रति तथा गएको दशकमा देशमा जारी हिंसाका कारण ज्यान गुमाएका नागरिकप्रति न्याय गर्न माग गरेका छन् । गएका केही दिनयतादेखि यहाँ सरकारका विरुद्धमा आन्दोलन भएको छ र यसबाट अहिलेसम्म मृत्यु हुनेको संख्या ४३ पुगेको छ । सरकार विरोधी प्रदर्शनमा विश्वविद्यालयका विद्यार्थीको उल्लेख्य सहभागीतामा प्रदर्शनकारीले निलो र सेतो झण्डा देखाइएको थियो । सो प्रदर्शनमा विद्यार्थलाई अन्य युवा र ज्येष्ठ नागरिकले पनि साथ दिएका थिए । निकारागुवाका राष्ट्रपति डानियल ओर्टेगा र सामाजिक सुरक्षा पुनरावलोकनसम्वन्धी कानुनका विरुद्धमा आन्दोलन भइरहेको हो । यही अप्रिल १८ देखि निकारागुवाका विभिन्न ठाउँमा ठूला प्रदर्शन भएका सञ्चार माध्यमले जनाएका छन् । आन्दोलनकारीले ७२ वर्षीय वामपन्थी नेता र उहाँकी श्रीमती तथा उपराष्ट्रपति रोसारिओ मुरिल्लो विरुद्ध पनि चर्को आक्रोस पोखेका छन् । आन्दोलनका क्रममा पसल तथा घरहरु तोडफोड र लुटपाट हुनुका साथै हिंसात्मक आक्रमणसमेत भएका पनि प्राप्त समाचारमा जनाइएको छ । सामाजिक सुरक्षा सुधारसम्बन्धी नयाँ कानुनको विरोधमा सुरु भएको आन्दोलन राष्ट्रपति ओर्टेगाले कानुन फिर्ता लिँदासमेत रोकिएको छैन ।
